A hleice in ralkap ih țuanvo cu rampi humhim a si ko na’n a țulnak vekin rampi țuanvo pawl cu a langten țuanvo lak a si thu rampi thuneihnak latu senior general Min Aung Hlaing in September 14 ah Pyin Oo Lwin ih ralkap sungkua tonkhawmnak ah simfiangnak a neih thu ralkap zung cun thuthannak an nei.
Hi tonkhawmnak ah “2020 rampi hrilawknak ah vote dik lo pawl hmuh a siih țuanvo neitu a sangsang ten simfiang dingah dilnak neih a si ko na’n simfiangnak an tuah lo hleiah a țum thumnak hluttaw an ko ih rampi thuneihnak pawl cu hramhram ih la dingah tumtahnak an neih ruangah rampi cu ramkhel vekin emergency dinhmun ah thuthannak nei in temporary president ih țuanvo apnak vekin rampi thuneihnak cu ralkap in a langten țuanvo an lak thu” senior general Min Aung Hlaing in simfiangnak a nei.
Senior general Min Aung Hlaing cun rampi thuneihnak a lak thok ihsin vote dik lo ruangah rampi thuneihnak cu ralkap in a langten țuanvo lak a si thu cu ramsung ramleng ih zum dingin a sim ringringnak hi thla 7 a liam zo.
Asina’n a tongkam le a hnațuan dan pawl cu Myanmar mipi in an cohlan lo vekin leitlun ram tinkim khalin an cohlang thei lo.
CDM cangvaihnak teltu captain Lin Htet Aung cun senior general Min Aung Hlaing cu ralkap parih rinngamnak a tlaniammi pawl humhim dingah ralbawi tlawng ah sawm ngiarnak tuah in a feh si ko tiah a ruah dan a sim.
“Amah lam ahhin dinpitu a nei nawn lo timi le a ruah ban lomi pawl thil tampi a suak thei timi a zum ruangah sawm ngiarnak a tuah tiah ka hmu, NLD ih vote a fir timi cu tuini tiang zohman in an zum lo, ralkap sung khalah hi thuhla cu thinlung ten a zum lotu zatek 50 tluk an um, curuangah amah lam ah dinpitu a tlaniam pang ding tiah amah rori feh tahratin sawm ngiarnak a nei tiah ka ruat” tiah captain Lin Htet Aung in a sim.
CDM cangvaihnak teltu captain Zero khalin senior general Min Aung Hlaing ih simfiangnak a tuahmi thuhla thawn pehparin tuini ih amah zum ngamtu cu ralkap sungkua mi malte lawng an si thlang, a leng lam ah zohman in an zum ngam nawn lo, amai hnenih zum ngamnak nei hrihtu ralkap sungah sawm ngiarnak a tuah rero si ko, annih pawl khal a leng lam thawn pehtlaih awknak an phihsak ruangah an zum ngam sunzom vivo a si bik, cumi a theih ruangah simfiangnak a tuah rero si ko” tiah a ruah dan a sim ve.
Cuihleiah senior general Min Aung Hlaing cun NCA lungkimnak vekin a cang theitawk in mipi ih duhmi kum tluan remdaihnak ngah thei dingah a zuam rero thu khal a sim tel.
Asina’n leiram taktak ahcun NCA lungkimnak hmin khengtu tlangpar miphun hriamkai pawlkom KNU thawn doawknak an neih hleiah NCA lungkimnak hmin kheng hrih loti KIA thawn khal an kap aw rero.
Cumi hnakih țihnung rapthlak cu Myanmar rampi ralkap in thuneihnak a lak rualin cui thiltuah dan dokalhtu minung zatel cun PDF din in ram pumhuap hmunkip ah doawknak a suak.
Curuangah senior general Min Aung Hlaing ih simmi kum tluan remdaihnak ngah thei dingah kan zuam rero timi cu a cang thei lomi thil a si thu ramkhel zingzoitu pawlin an sim.
Myanmar rampi cu ralkap in thuneihnak a lak February 1 ihsin September 14 tiang ralkap ih meithal kahnak ruangah mi 1089 an thi ih mi 6400 kaih an ton thu AAPP in thuthannak an nei.
