Khawvel huapa Social Media hman tlanglawn, nitin maktaduai tel lut leh chhuak awmna Instagram ah zaithiam leh lemchan thiam Selena Gomez chuan Record chhinchhintlak tak a siam.
Zirtawpni (March 17) ah Selena Gomez hi hmeichhe zinga Instagram platform ah zuitu (followers) maktaduai 400 nei kai hmasa ber a ni a, a ni aia zuitu nei tam hmeichhia hi tumah an awm lo.
‘Only Murders in the Building’ star hian tunhnai deuh lawk khan maktaduai 381 Instagram ah hian zuitu nei tlingin Record chelh tu hmasa Kylie Jenner chu hmeichhe zinga Followers neih tam lamah a rawn khum a, ‘Queen Of Instagram’ title chu la let in heta tang hian a ni telin a Followers in pun lam a pan zel a ni.
Selena- i’n hmeichhe lamah Followers ngah ber a nih lai mek in football player, Cristiano Ronaldo chuan 562 million followers neiin Instagram a zuitu ngah ber a ni a, Lionel Messi chuan 442 million followers a nei mek bawk. Ronaldo, Messi leh Selena te chiah hi followers maktaduai 400 nei tling thei an la ni.
“Lose You to Love Me” singer hi hun rei tak chhung Instagram a chawlhsan. A phone a a app a paih atangin kum 4 laia a liam hnu January thla ah post a siam thar leh chiah. InStyle hnena a hrilh dan in Instagram chuan amah ah a tha lo zawng a nghawng a neih vangin hun hman rengna tlak ah a ngai lo a, a team member hnen ah posting rights a pe tih a sawi tel bawk a ni.
Heti tak mai a Selena in thawk leh khat ah Instagram platform a zuitu a neih chak em em chhan ni a lang chu tunhnai lawk a Entertainment huangchhung a hmeichhe pathum te Drama sawi hlawh tak vang kha niin a lang a, hei hian Selena Gomez hi Instagram followers neih tam kawngah nasa takin a pui niin a hriat bawk.
