Zaithiam leh Lemchanthiam, Selena Gomez chuan Apple TV+’s Dear… a Interview thar ber a neihna ah chuan a nunna chhanhim sak tu a thiannu Francia Raisa hnen ah thinlung tak in lawmthu a hrilh a, an inkara inthianthatna leh hmangaihna thuk tak awm chu a ngaihlu hle.
Kum 2017 kha Selena Gomez tan chuan a kum tha lo tak zinga mi a ni a, Lupus vanga harsatna a hmachhawn te chu a sawichhuak. Hun harsa leh khirh taka a dinlai mek in amah hmangaih em em tu a thiannu chu atan ke a penchhuak a ni.
Selena chuan Francia in a kal (kidney) pakhat a pek dawn a test hrang hrang a paltlang hnu ah a taksa nen alo inmil chiah a ni tih a hriatchhuah khan vanneih a intih zia leh a lawmzia a sawichhuak bawk a, Francia hian a kal pek ngei kha a duh zia hria in hetiang ang mahni hmasial lo thian a neih vangin a lawm hle. Francia lakah damchhunga leiba rulh zawh rual loh a nei tih pawh a pawm hmiah bawk.
A chunga thleng hi mi nazawng chungah a thleng ngai lo tih a hrechiang hle a, chung mitlem te zinga a thiannu zara a chan chu ropui a ti tak zet. June 2017 a kidney transplant hlawhtling tak an neih zawh ah Selena leh Francia hian he ni hriatreng nan Tattoo in ang an chhu bawk.
Billboard’s 2017 Woman of the Year award a dawn tum in Selena chuan thu a sawina ah vantlang hriat in Francia chungah mittui tla chungin lawmthu a hrilh tawh a, “dik tak chuan he award hi kei aiin Francia dawn tur zawk a ni, a chhan chu a ni hian ka nunna min chhanhim sak a ni” tiin a sawi.
Mahse nikum atang khan Selena in Francia nen an inthianthatna a chawinung duh ta lo lutuk tiin sawisel a hlawh a, an pahnih inkarah pawh sawi neuh neuh awm phah in mahse Selena interview thar ber atangin an inthian thatna erawh a hma ang bawkin ala pangngai reng tih a hriat theih.
