Mague ramțhen Salin khawpi ih ralkap council mi ceknak gate ah tuini August 17 zinglam suimilam 10:00 hrawngah bomb a puak ih palik pakhat a thi, palik 2 hriamhma nasazet an ngah tiah khuami 2 in an sim.
“Minbu – Salin lamzin ih thilcangmi a si, atu hrih ahcun zawi kutneh timi fiangten sim a theih hrih lo, gate kiltu mi 7 hrawng an um ih, bomb puak cun mi 3 a ngah, pakhat a hmun ah a thi cih, pahnih an dinhmun a țha lo, an tuamhlawm rero” tiah Mague khawpi um mi pakhat in a sim.
Mi ceknak gate inn cu a siat thluh ih bomb hriamhma tuartu mi 2 khal thi thei dinhmun an si thu a sim bet.
“Hivek cun kan lam ahcun Pwintphyu, Salin, Minbu ah tuletu bomb a puak țheu, tuini cu bomb puak a nasatuk, a siatsuahmi khal an tam, gate umnak inn le vunnel dip an sonmi pawl tampi a siat” tiah khuami pakhat cun a sim.
Ralkap council do dingah Mague ramțhen sung Salin telin peng tampi ah PDF an din ih, atu hi ralkap council khawkhannak dotu peng an tam vivo thlang tiah Salin khawpi ih um mi pakhat in a sim.
