Pakistan ram a mi Christian sakhaw vuan tu pakhat chu midang sakhaw vawn zahsak lo a sawichhe tu ah puh in thiam loh chan tir a ni.
Hepa hi kum 34 a upa Ashfaq Masih a ni a, Pakistani Session Court chuan Thawhtanni khan a hremna tichhuak in thi turin a chungthu a relsak.
Thil thlen hun hi kum 5 liam ta daih tawh khan a ni a, Ashfaq Masih hian Lahore ah bike mechanic shop a nei. A customer zinga mi Muslim sakhaw vuantu hian pawisa chawi tur a tih ang zat a neilo a, sakhaw lama in hmang tak a nih thu hrilh in tlawm a dil. Mahse Masih hian Christian sakhaw vuantu a ni a, Muslim lam in an zui Prophet Muhammad tih vel chu a rinzawng a nih loh thu hrilhin a hlawh ang tur zat pe turin a ti.
Hei vang hian Masih lak ah thubuai siam sak a ni a, sakhaw dang sawichhiat sak leh zahlo tu ah puh in June 2017 khan man a ni. Pakistan hi sakhaw chungchang bawlhhlawh zawng leh Pathian zahlohna tawngkam hmang te hremna pe na thei tak ram an ni.
Kum 5 hnu ah Lahore court hian Masih hi thi turin hremna a chhuah. A nupui leh a fanu ten him dam tak a chhuah zalen hram turin ngen mahse tihhlawhtlin sak a nilo thung.
2019 khan Masih nu hi a thi a, a nu vuina hmang tur hian chhuah lailawk tir a ni. Tarlan dan in Masih hi man a nih khan a chhungte chu Lahore chhuahsan turin an ti a,a chhan pawh Muslim sakhaw zuitu dang te chu a kalh zawng a che in an lak ah tharum thawh mai an hlauh vang a ni.
