Sagaing ramțhen sungih peng 37 sungah veng uktu le khawbawi pawl hnațuan suahnak ca an thunlut ciamco ih November 15 tiang ahhin suahnak ca thunluttu zatek 50 an lan zo tiah khawbawi pawl hnenin theih a si.
Veng hotu pe khawbawi pawl hnațuan an suahnak thuhla ah Sagaing ramțhen general administration office naivai mi pakhat cun “Sagaing ramțhen ah distric 11, peng 37, khawpi 50, veng 271, khua uksuh 1755, khua 5991 a um, ramțhen sungih veng 270 lenglo ah veng hotu umnak hi veng 100 an kim lo, khua uksuh 1700 lenglo khalah suahnak ca thunluttu mipum 1000 hrawng an um, zatek zawngih sim ahcun hnațuan suahnak ca thunluttu hi zatek 50 a lan, ramțhen huap ah a tu her aw reromi veng, khua hotu zatek 50 an kim nawn lo” tiah a sim.
Cuihleiah November thla thok hrawngih hnațuan suaktu Shwebo distric Yioo peng khawbawi pakhat in “khua hruaitu (ဥက္ကဌ) kum 3 le khawbawi (အုပ်ချုပ်ရေးမှူး) kum 2, a pehpeh in khawbawi kum 5 ka țuan zo, atu vekin sungkua nunnak tiang hrinhronak a um dah lo, hnațuanpi hrekkhat thah tong le an sungkua thah an ton ruangah mai sungkua hmailam zoh in hnațuan ka suak” tiah a sim ve.
Sagaing ramțhen sung cu 2021 March thla ihsin veng le khua hotu hrekkhat cun hnațuan suahnak ca an rak thunlut rero zo. November thla thok lam khalah Yioo, Khin Oo, Țanse, Debeyin, Vuatlet, Minmu, Kalay, Htaychaing, Indaw, Kanbalu le Chunhla peng pawlih suahnak ca rak thunlut hrih lotu pawl khal suahnak ca an thunlut rero tiah theih a si.
Cuihleiah Sagaing ramțhen ih acozah zung hmunpi Monywa khawpi ah veng 31 a um ih, cui veng 31 ah 2021 February ihdin tuini tiang hotu an um lo tiah theih a si.
