Sagaing ramțhen Katha peng, Htaychaing peng le Mague ramțhen Myaung peng pawl ah November 17, 18 ah ralkap pawl thawn doawknak, bomb thawn donak pawl a um ih ralkap 10 hnakih tam an thi tiah theih a si.
Sagaing ramțhen Katha peng ah November 17 zaanlam suimilam 3:40 ah Chawngwa khua uksuh Yichansin khua kiangah ralkap le KIA/PDF kahawknak a suak ih ralkap 5 an thi, mi 2 hriamhma nasazet an ngah thu, PDF lam ihsin mi pakhat hriamhma malte a ngah ih thlaphan ding a um lo thu Katha tualsung media in a sim.
Cuvek thotho in November 18 zinglam suimilam 5:00 ah Sagaing ramțhen Htaychaing peng Myațawng lamzin tonawknak ihsin ra fehtu ralkap motor pakhat cu Țunglung khua kiangah bomb thawn an rak do ih bomb ih ngahnak ruangah motor a feh thei nawn lo thu, motor mawngtu amah lawng a tlanhlo ih motor parih ralkap pawl cangvaihnak an neih lo thu, ralkap motor pakhat a ra thlengsal ih Htaychaing PDF pawl dung an rak sipsal thu, hi bomb puak ah a mal bik ralkap 5 an thih thu tualsung media TR cun a sim.
November 17 zaan nazi 11:00 hrawngah ralkap țanhmun dungsiptu ralkap motor 3 cu Monywa khawpi ih ralkap hmunpi ah ra tlun laifang Oo-bu tlang lilawn le Ngadaing khua kiangah bomb thawn an do ih motor hrekkhat an siat thu, hlaral bomb control ih do a siih ralkap motor pakhat a siat thu, hi bomb puaktertu cu Monywa Night King le သံမဏိ hriamkai țangkop an si thu tualsung hriamkai pawlin an sim.
Cuvek thotho in November 18 khalah Mague ramțhen Myaung peng saklam Htun Mya Yarthanar lamzin ah ralkap motor pawl cu MVRF hriamkai pawlin bomb thawn an do ih ralkap motor pakhat a siat ih ralkap thitu pawl zinzoi rero lai a si thu tualsung hriamkai pawlin an sim.
Cuvek thotho in Naypyitaw khawpi ဇမ္မူသီရိ peng ပြန်ကပြေး(အောင်ဇမ္မူ veng) အောင်ဇမ္မူ lamzin ih veng xung hmaiah November 17 zaan nazi 8:50 hrawngah bomb a puah thu, Naypyitaw ပျဉ်းမနား ih lilawn 85 ih ralkap hmuan sung 85 thawnginn kiangah November 17 zaan nazi 10:30 hrawngah bomb a puah thu, hi bomb puak pawl ruangah mithi le hriamhma ngahtu an um lo thu Naypyitaw tualsung media hnenin theih a si.
