Sagaing ramțhen Shwebo distric le Katha distric sungah October 3 – 24 tiang ni 20 sungah palik zung 7 an kang tiah tualsungmi pawlih simnak vekin theih a si.
October 24 zaan suimilam 11:00 hrawngah Shwebo distric Dibezin peng Ngiawnghla khua ih palik zung a kang tiah Dibezin khawpi ih umtu pawlin an sim.
“Zaan suimilam 11:00 hrawngah a kang, meisa cu a al țha nasa, zaan suakvak lo ding thupek a si ruangah zohman kan suak ngam loih ziangzat a kang timi kan thei hrih lo” tiah tualsungmi pakhat in a sim.
October 10 zaan suimilam 10:00 hrawng khalah Dibezin peng Tityarai khua palik zung a rak kang. October 18 zinglam suimilam 1:00 hrawng khalah Shwebo distric Țanse peng Nabetgyi khua palik zung a kang.
October 20 zinglam suimilam 2:00 hrawng khalah Kawlin distric Pinlebu khawpi myoma palik zung sungah inn sak tharmi pakhat a kang ih cui innkang mittu police second lieutenant pakhat hriamhma nasazet a ngah ruangah Pinlebu siizung ah ICU dinhmun in tuamhlawm rero lai a si.
October 15 zaan suimilam 9:00 hrawng khalah Irrawaddy tipi le Shweli tipi tonawknak hmun Katha peng Inn khua ih palik zung a kang ruangah palik zung sungih inn zaten a kang fai thluh.
October 3 zaan khalah Katha distric Htaychaing peng Alețaw khua palik zung a rak kang ih October 4 zaan ah Kanni palik zung 2 a rak kang.
Curuangah Sagaing ramțhen sungah October thla ni 20 sungah palik zung 7 a kang tiah theih a si.
