Sagaing, Mague ramțhen le Chin ramkulh ramri nitlaknak saklam ralkap hmunpi hmunram cu ralkap council hriamkai in October 9, 10 ah raldonak thilri hmangin an nuai ding timi thuhla a um ruangah tualsung mipi pawlin ralthan dingah an timtuah aw rero tiah theih a si.
Ralkap council hriamkai pawl cun Yaw hmunram, Pale le Myaung peng pawl ah helicopter pawl, hriamhreipi pawl le ralkap thazang nasazet in a bet tiah tualsung PDF pawlin an sim.
September thlacem lam ah Sagaing ramțhen, Mague ramțhen le Chin ramkulh ramri nitlaknak saklam ralkap hmunpi hmunram ah a langten țuanvo latu dingah Lt. General Than Hlaing cu țuanvo an pe hnu ihsin raldonak hriamhrei thilri hmangin an nuai ding tiah thuhla a suak.
Ralkap council cun October 9, 10 ah raldonak hriamhrei thilri hmangin an nuai ding timi thuhla a suah ruangah Sagaing ramțhen Pale, Yinmapin le Pungțawng-pungngia hmunram ih mipi pawl cu khua le ram suahsan dingin an timtuah rero. Kankaw – Kalay lamzin tluan ah ralkap council cun ralkap thazang tam zet a retmi hmuh a si tiah Sagaing khawpi ih ramkhel cangvaitu mi pakhat in simnak a nei.
“Ralkap hmunpi ih a langten țuanvo kaitu Lt. General Than Hlaing ih țuanvo a lak hnu September 30 ih tuahmi thurelnak an țheh hnuah hi thuhla cu a suak, daan vekih casuahmi cu a um lo, asina’n ralkap thazang an ret dan le țanhmun an khuar dan vek asile doawknak nasazet a um thei ruangah tualsung mipi pawl cu an relh rero” tiah a sim.
Sagaing ramțhen Myaung peng khalah ralkap council cun sniper ralkap pawl, raldonak tank pawl le ralkap pawl nasazet in a bet rero tiah tualsung PDF hotu cun simnak a nei.
Sagaing ramțhen Pale peng PDF hotu Bo Naka cun October 9, 10 ah ralkap council cun doawknak a tuah ding timi thuhla cu kan hngak hrih ih do lehsalnak lamzin kan timtuah rero tiah a sim.
Mague ramțhen Yaw hmunram, Kankaw peng sung khalah ralkap council cun ralkap thazang tam zet hmangin helicopter, pukpi pawl le ralkap thazang tam zet a bet tiah YDF țuanvo neitu pakhat in a sim.
Tualsung mipi pawl khal doawknak a thlen hlan ah relh thluh cia thei dingin thuthannak kan nei timi khal a sim bet.
October 7 zinglam ah Mague ramțhen Kankaw distric ih ralkap council hriamkai khalahyah 50 ihsin ralkap motor 50 lenglo cu Hakha – Kalay lamzin tonawknak cu an hmuitin ih October 8 zinglam ah Kalay khawpi sung an lut.
Ralkap council cun Kankaw – Kalay thilri kuatawknak lamzin hrangah Mague ramțhen Kankaw distric sungih Saingdo khuami minung 40 cu hmaițhitu ah hmang tahratin October 8 ahcun an thlah thluhsal.
Ralkap council cun Chin ramkulh cu zarhhnih sungah țheh ko a nuai ding timi thuhla khal a suak ih Mindat CDF hotu pakhat cun doawknak a suah tikah result khal a suak ve ding tiah simnak a nei.
Nitlaknak saklam ralkap hmunpi hmunram ah ralkap council ih doawknak a tuah ruangah tualsung mipi 40000 lenglo ralrelh ih khua an sak ih nuntu khawsaknak lam khal harsatnak nasazet an tong tiah theih a si.
