Yangon ramțhen S. Dagon peng saklam thlanglam lamzin tonawknak kiangih palik zung cu November 25 sundir suimilam 12:00 hrawngah zo timi theih lo hriamkai pawlkom pakhat cun meithal thawn an kap ih palik pakhat a thi tiah tualsung media pawl le tualsungmi pawlin an sim.
“Palik zung cu lamzin ihsin an kap, palik duty pakhat a thi tiah kan thei, atu cu kilhimtu pawl an hnok ngaingai, a kah caan ahcun meithal puak cu a tam nasa, duhthusam rori’n an kap si ko” tiah S. Dagon saklam thlanglam lamzin tonawknak kiangih um mi pakhat in a sim.
Tualsung media South Dagon Information Team cun saklam thlanglam lamzin tonawknak kiangih palik zung cu zo timi theih lo hriamkai pawlkom pakhat in tuini sundir suimilam 12:00 hrawngah meithal thawn an kap ih palik zung sung khalin an rak kah ve thu a tarlang. Cuvek thotho in November 25 zaanlam suimilam 2:00 khalah bomb puak ring zet theih a si thu tualsungmi pawlin an sim.
November 24 khalah S. Dagon palik inn umnak pawl le vuanțhan inn umnak pawl kiangah bomb a puak nasa tiah theih a si.
