Khawvel in a ngaihven a, Russia leh Ukraine te inkar pahnih buaina hian engchen nge an thlen ang tih lai mek in indo thu thang a ri ta riap mai.
Russia President, Vladimir Putin chuan Ukraine laka tlawm zawk nih tum lovin military operation tur a thupek a chhuah hnu ah vawiin Feb.24 khan Russian forces ten Ukraine hmun hrang hrang missiles in an bei. Ralthuam tha tak tak leh sipai te nen thawk in Ukraine ah ruah ang maiin missile an sur tir.
Mihring thi leh hliam eng emaw zat an awm tawh a, tlai lam 4:46 pm IST a chanchin tarlan ah 40 Ukranian sipai leh 50 Russian soldiers te an thi a,Ukraine’s Odessa ah 18 civilians te missile attack ah an thi bawk. Ukraine’s defense ministry in Russian thlawhna 5 leh helicopter 1 an kapthla tih an tarlang.
Russian defence ministry chuan Ukraine ah air bases, air defences te an nuai chimit an ti. Ukraine lam an khawngaihthlak hle a, ramdang puihna beisei mahse ram ropui US meuh pawh tawngkam tih loh chuan a che chhuak hleithei lo. Ukraine’s president in martial law a puang nghal a, UN chief ten Putin chu a sipai pawl te Russia ah hnukkir turin a ngen tih an tarlang.
NATO Chief, Stoltenberg chuan indona chhuak ah hian Ukraine ah tanpui turin sipai te thawnluh tumna an nei lo tih a sawi a, Ukraine’s ambassador chuan India lak ah tanpuina ngen in PM Modi chu President Putin nen thiantha an ni a, he an buaina hi chinfel pui ah a sawm.
UK PM Boris Johnson chuan Putin chu ‘dictator’ tiin a ko a, he thil hi an en liam lo ang tiin Ukraine mipui te a hnem. Russia hian Donald Trump hunlai angin Biden kaihhruaina hnuai ah US hi a hlau lo chher chher viau tih pawh a chiang reng a, Afghanistan leh Taliban te inkar thu hla atang tawh in US hian a mawng a hlim tawh ani.
