Ruihhlo hi chuan chhungkaw tan thil tha tak a thlen lo reng a ni. Rethei leh harsa em em chung a ruihhlo ngawl lo vei chu retheih zual zelna ani ringawt.
Punjab a Moga district a cheng chhungkaw pakhat te chuan an fapa kum 23 a upa in ruihhlo zawnga a chhuah theih tawh lohna tura thil tha ber nia an hriat angin Chain in an thlung bet tih hriat a ni.
Video clip leh thlalak te Internet lama phochhuah a nih hnu ah a darh chak viau nghe nghe. A nu in a sawi danin kum 5 leh kum 6 liam ta atang khan ruihhlo hi a khawih tawh a, ni khat ah cheng 800 lai hmang thin in an chhungkua in a tawrhphah hle a ni a ti.
An chhungkua hi khawsak harsa tak leh nitin inhlawh chawp a ei zawng thin an nia, a nu chuan an fapa hian a sum hmuh chhun ang a piang te chu ruihhlo lei nan a hmanral zel thin thu leh pawisa a neih loh tawp ah an chhungkaw bungrua in a tawrhphah thin tih a sawi.
“A chang chuan ruihhlo khawih tur a neih theihna turin inchhungkhur thil a ru chhuak thin a. Pawisa a neih loh chuan tharum thawh zawng ten a che tel bawk a ni” tiin a sawi.
Ni eng emaw zat chhung chu khum te tak te ah chain in an lo thlung bet tawh. A nu chuan an chenna khua ah hian ruihhlo awlsam taka neih leh lei mai theih a a awm thu a sawi a, ruihhlo zuartu te vau a rikrap turin sorkar hnen ah khauh taka hma la turin a ngen zui bawk a ni.
