Pawisa khawl hi thil har tak a ni a, neih deuh chuan hman zung zung pawh awlsam tak a ni. Midang puihna tello a mahni pawisa ngei hmang a thil duh leh it zawng tak neih theih hi a hlu bik thin.
Telangana tlangval pakhat Venkatesh hi mi tumruh leh a thil tih tawh ti mai mai lo chi a ni a, Rs 1 coins ringawt chu hun eng emaw chen a khawlkhawm hnu ah cheng nuai 2 aia tam daih mai, a duh leh it tak Bike a lei tih hriat a ni.
Venkatesh hi Mancherial district a Tarakarama Colony, Ramakrishnapur a cheng leh khawsa a ni a, polytechnic student niin Rs 1 coins hmang hian showroom ah KTM bike a thlang. A bike man hi Rs 2.85 lakh laia tam a ni bawk.
Pawisa nawi te hi Venkatesh hian bag 112 lai ah a thun khawm a, bag pakhat hi 10kg zel a rit a ni. A sum mamawh tur zat nei tawk a a hriat hnu ah Coins tam tak nen bike zawrhna hmun a pan a. Showroom hnathawk tu te hian a tirah chuan hnawksak khawp a tam coins hmanga lirthei pekchhuah chu an remti lo a, amaherawh chu a tumna leh a beihna vang hrim hrim in an lo pawmsak.
Staff te hian nuai 2 chuang a tam coins chhiar nan hian hun pawh an seng hnem viau. Venkatesh hian YouTube channel siam bawk in a thawhchhuah leh a pawisa khawl hmanga a duhthusam tak Bike a lei lai hi thlir theihin a dahchhuak.
Coins hmanga thil to tham tak tak lei hi hriat tur a awm ve ta fo a, kum in March thla ah pawh Tamil Nadu pa in coins a khawl hmangin Rs 2.6 lakh man Bike a lei tawh bawk a ni.
