Sagaing ramțhen Kalay khawpi saklam ah ram țhat lo cu caan țha ah la tahratin bing rang le a pehtlaih rittheihsi zuartu an um ruangah cumi pawl cu Kalay PDF saklam battallion cun ralrinnak an pe.
Kalay PDF saklam battallion ih ralrin peknak thusuahmi sungah palik khalin an kai lo tikah bingrang le a pehtlaih rittheihsi pawl cu zalen zetin a zuartu tampi an um, anmah ruangah mino tampi an nunnak a siat, curuangah Kalay PDF cun kutsih in kan zoh men lo dingih kan control ding, Tahan saklam ah a zuartu an tampi, Tingo le Minhla khua karlak tiva ah mino pawl rittheihsi an hmang timi thuhla kan thei, Letpanchaung ah rittheihsi zuartu mi 2 an um, ralrinnak kan pe ih an thlun duh lo asile kan thianfai ding, mipi pawl khal rittheihsi zuartu nan theih asile khua, hmin le thuhla felfai in sim uh” tiah an tarlang.
2015 hnu lam ihsin Kalay khawpi saklam Letpanchaung lamzin tluan khua pawl ah rittheihsi zuartu an tampi ih 2020 ahcun lailak tlawngta le suakthuan tlawngta pawl tiang in rittheihsi an hmang tiah khua hotu pawl hnen ihsin theih a si.
Rittheihsii cu India ramri Tamu ihsin a lut ih khua pawl ah palai pawlin an zuar. Rampi ih zangfahnak thawn rittheihsi thamtu le zuartu pawl a thlahsal, siipia le bingrang zuar dan a mal vivo ko na’n a hmangtu an karh vivo tiah theih a si.
Ref : Zalen
