Tuni March 17 Kalay, Tahan ah ralkaap uknak kan duhlo tin lamzawh duhphorhnak langter mi mipi pawl cu ralkaap nih meithal in a rak kaap ih mi pa 4 nunnak an liam ih, kan Falam mi le sa sung ihsin Salai Cung Lian Ceu tla a tel a si.
Salai Cung Lian Ceu cu- Sagaing ramthen, Kalay Peng, Cicai khuami Pa Tlang Lian Kham le Nu Van Siang Nei Par te ih fapa a si ih, a tu ah kum 25 lawng a si hrih. Rangoon ah B.Th in Bible tlawng a theh ih, Mandalay ih um လူမျိုးပေါင်းစုံအသင်းတော် ah Mino Saya tuan rero tu a si. Cule, အဝေးသင် in Secular tlawng kai thok tum rero tu tla a si.
Salai Cung Lian Ceu cu- tutum ih Spring Revolution (Thalpau Dothlennak) ah Falam mi le sa sung in hmaisabik nunnak liamtu a si. Myanmar ram dothlennak thuanthu, Chin le Falam mi ih miraltha cazin ah na hmin ngan khum a si. Na nunnak cu a liam hman ko sehla, na thuanthu le na peekawnak cu kumkhua a hmun ringring ding.
Kan nih “We Stand with Falam CDM Heroes” pawl in tla thaizing ih tuah dingmi Salai Cung Lian Ceu ih ruakvuinak program cu upatnak peek in tuanvo laak ding kan si tiah tla theihter kan duh a si.
“Rest in Power, Salai Cung Lian Ceu”
We Stand with Falam CDM Heroes
Nithla: March 17, 2021