Mipi nunnak kilhim dingah doawknak neih ding a siih, cui doawknak thok ding ni cu relkhawm in thutluknak tuah ding a si thu NUG Acting President Duwa Lashi La in August 17 ih tuahmi NUG meeting 19/2021 ah simnak a nei.
“NUG dinhmun in nitin thah tongtu mipi nunnak kilhim dingih doawknak kan neih ding ruangah timtuahnak pawl cu țuanvo neitu pawlin cawl loin an tawlrel thu, doawknak thok ni relfel tikah cabinet ah a thuhla fehpi sal in thutluknak tuah khawm ding a si thu” NUG Acting President Duwa Lashi La in a sim.
Hmai thla September ah UN Myanmar Ambassador ah U Kyaw Moe Htun ret bet theinak hrang Credential thuhla ah ram tinkim theihpinak a thupit bik ruangah timtuah-awknak lam pawlkom, thuron pekawknak lam pawlkom pal din a siih, ASEAN ih Myanmar palai a ra thlen khalah NUG dinhmun in thurelpinak nei dingah policy tuah a tul thu NUG Acting President cun a sim bet.
Covid – 19 nathrik khamnak lam thawn pehparin Covid – 19 Respone commission ih Dr. Zaw Wai Soe hohanak in ramsung ramleng pawlkom pawl pehtlaih in nasazet ih zuam rero a si thu, Covid – 19 khamnak lam ah ralkap council ih khawkhan thiam lo tuknak le mipi humhim hnakin thuneihnak lawng an humhimmi cun rampi siatnak lawng a si ruangah Covid – 19 khamnak lam ahhin acozah le mipi nasazet ih țuan khawm ding a țul thu NUG Acting President Duwa Lashi La in simnak a nei.
