Myanmar ramah PJ tiih kawhmi hnațuannak Passport le ramdang fehtu pawl ramleng hnațuannak evidence OWIC smart card tello cun ramleng feh sian a si nawn lo. MOU agreement thawn ramleng ah hnațuan dingih țulmi card cu atu ahcun PJ Passport hmuh ding a si tiah Immigration cun October 15 bikhiah an tuah. Curuangah vanzam to ngah loin Airport ihsin kirsaltu an um hnuaihni tiah theih a si.
Myanmar ramah ramleng fehnak Passport phunphun a ummi lak ihsin PJ tiilah mi tampi ih theihmi Job Passport kaitu dinhmun in ramleng hnațuannak evidence OWIC smart card hmuh thei lawngah ramleng suah sian a si tiah immigration department cun bikhiahnak thar an tuah. October 15 ih Immigration department in thusuah a tuahmi cu October 16 ihsin an hmang thok cih ruangah ramleng feh ding mi hrekkhat pawl ramleng suah an kham ih Airport ihsin an kirsal.
Ramleng hnațuannak evidence card OWIC cu tuihlan ah acozah veve MOU agreement tuahtu ram pawl ah hnațuan dingih fehtu pawl lawng hmuh dingah a țul na’n atu ahcun PJ Passport kaitu zo vek khal OWIC smart card hmuh hnu lawngih ramleng suah sian a si ruangah mi zate hrangah a harsa thluh tiah Yangon hrambun ramleng khualtlawnnak lam tawlrelnak pakhat ih țuanvo neitu pakhat in simnak a nei.
“October 15 ah ca a suak, October 16 ah Reject an tuah, cuihnu cu an tuah vivo, October 18 khalah an tuah, minung an mal lo nasa, PJ kaitu pawl asile OWIC smart card a tel lawngah feh suak ding timi cu tuihlan ah kan theih vek asile Japan, Korea, MOU agreement tuahtu ram ih hnațuan hawlsaktu, cuvek agreement vekih thlahmi hnațuantu lawngin hi card a rak țul timi kan thei, atu PJ kai ih OWIC smart card um lo cun ramleng feh a ngah lo, block awk vekah a cang, hi daan hi October 15 ah ca a suak ih October 16 ihsin Action an lak tikah zohman in an theih lo tikah an zaten block an tong, zohman a remcang an um lo” tiah khualtlawnnak lam tawlrelnak pakhat ih țuanvo neitu pakhat in a sim.
Myanmar ah sailor pawl, tlawngta pawl, nomawknak ih khualtlawng pawl siar lo ramleng hnațuantu ding pawl cu PJ Passport lawng kaih a rak si. Hrekkhat cu puaisa pawlin an dilsak ih PJ ngahtu khal an um. Atu cu OWIC smart card hmun țul dinhmun ih bikhiah an tuah ruangah tampi harsatnak an tong. Hi OWIC smart cart tuah dingah Naypyitaw zung ah dil a țul ih card ngah dingin hnațuannak lam online training kai tla a țul. Cutin a dotdot ten tuah rero a si hmanah smart card ngah dingah ziangzat caan hngak a țul timi simfiang theih a siloih harsatnak tam zet a um tiah agency pakhat cun a sim.
“Zovek minung in an tuah thei, ziangtin daan a um, ziangtin timi mipi lakah zohman in an thei lo, mi zaten Naypyitaw ih hnațuannak zung an fawn, kei khal ka thei lo, ziangtin tuah ding timi daan khalle anmah rori suh tikah (Immigration department) zung khalin an sim dan ah anmah khalin an thei lo, amah khal hi daan hi atu ihsin nung dingih hnațuan ding an si tikah felfaiten kan lo sim thei hrih lo an ti, lenglam ahcun a hnok celcel, thlakhat hlawh kan lo pe ding, ting 5, 6 pek ding, dollor 350, 600 tiin a phunphun in kan thei, kei khalin ka thei hrih lo, atu cu October 16, 17, 18 an Reject zo, thaisun, tipsun, thiamsun pawl zung khar a siih neta ni khal zung an khar bet ding, October 25 ah teh ziangtin cang pei maw, cui ni khal an Reject sal ko ding, hi thil hi tu rori ah tuah cih a theih si lo, tuihlan hmanah kan theih dan vek asile card ngah dingah thlahnih thum lai a rei tiah kan thei” tiah a sim bet.
Hnațuan dingih ramleng fehtu pawl cu daan loih pawlkom pawlin daan loin thilri khuatnak an um lo ding hrangah ramleng an suah hlanah International Airport pawl ah hnațuannak tlangbawi zung ih suahmi ramleng hnațuannak evidence OWIC smart card an ken le ken lo cekfel ding, an ken lo asile feh siannak pek lo ding tiah Immigration department ih October 15 casuahmi ah an tarlang. Hi thusuahmi cu a thei lotu an tam zet tiah theih a si.
