Sagaing ramțhen Shwebo distric Khin Oo peng ah Nurse tei’ nupa cu ralkap pawlin August 21 zaan ah an kah that tiah theih a si.
Thlaicinnak lam sii zuartu Ko Maung Aye le Nurse Ma Nuaih Nuaih tei’ nupa cu August 21 zaan suimilam 8:00 hrawngah Ba-oo khua ihsin pengkhat hrawng hlatnak Kantit khua ihsin bike thawn an ra tlun lam Khin Oo khawsuah lilawn kiangah ralkap pawlin an rak kaih thu sungkhat naivai mi pakhat in a sim.
“Sun ah mi an ra tuamhlawm, kannih khal khawsik vekin kan um ih sii in pe ta, zaan ah tlung hlah uh, hinah riak ta uh tiah an nulepa pawl khalin an sim, suimilam 8:00 hrawng lawng a si ruangah annih khalle an tlung” tiah simnak a nei.
Nurse tei’ nupa cu hi an fehnak khuahnih ahcun nitin feh sukso an siih atu ralkap pawlin an kap that ih an ruak cu Khin Oo siizung ah an ret, an ruak lasal dingah sungkhat pawl an theihter thu an sungkhat naivai cun a sim.
Nurse tei’ nupa cu Ba-oo khua ah thlaicinnak lam sii an zuar ih Kantit khua lamzin ihsin Khin Oo an ra tlun lamah kah an tong.
“August 21 zaan ah Khin Oo palik zung ihsin ralkap 2 cu an hriamhrei thawn an tlansuak ruangah Khin Oo khawpi cu meisa an mit thluh ih ralkap pawl cun hmuntinkim an dap, cu laifang ah Nurse tei’ nupa cu ralkap thawn an tong aw ih an pa cu an kap, Nurse cu a tlanih a tlannak lam ah an kap thotho ih a hmun rori ah an pahnih in an thi, meithal kaptu ralkap pawl hi zu an ri tiah kan thei, Nurse tei’ nupa ih kenmi tangka ting 14 khal an laksak, Nurse cu a pum ah an ngah ih an pa cu a cal ah an ngah” tiah khawsung mi pakhat iin a sim.
Nurse tei’ nupa cun kum 3 mi fanute an tansan tiah khuami pawlin an sim. Ralkap pawlin ziang thuhla ruangah an kap timi theih a si hrih lo.
May 25 khalah Khin Oo khawpi ih duhphorhnak tuahtu pawl ralkap ih an rak kah ruangah mi 2 an rak thi.
July 21 khalah Sagaing ramțhen Shwebo peng Kunsik khua ih U Thein Tin cu zaan suimilam 7:00 hrawngih khawleng ihsin a ra tlun laifang ah ralkap pawlin an rak kap that.
July 17 khalah Shwebo peng Kunsik khua ih kilhimnak lam hnațuan in khawlak vaktu tualsung mino 4 cu ralkap pawlin an rak kap that.
