Thantlang Centenary Baptist Church ih mino pastor dinhmun in Pathian hna a tuan rerotu Pastor Cung Biak Hum cu September 18 zaanlam ih Thantlang khawpi innkang mit dingin bike thawn a feh rero laifang ah ralkap pawlin an kah that tiah theih a si
Pastor Cung Biak Hum cu MIT, Yangon ihsin M.Div. a zir thluh hnuah Thantlang TCBC ah Mino Pastor a tuan rerotu a si. Mipi ih kan theih olnak bik dingah Pastor Cung Biak Hum cu hlasak thiam Sui Tha Par ih innsangpa a si tiah The Hakha Times in a tarlang.
“Pastor dang thawn Thantlang tlawnginn veng innkang mit dingah an feh ih, Market veng an thlen zawngah ralkap pawlin an kah, a rualpi midang cu an relh man” tiah khuami pakhat in The Hakha Times ah a sim.
Pastor Cung Biak Hum cun a innsangnu le fate 2 a tansan tiah theih a si.
Tuini Thantlang khawpi ah ralkap pawlih hriamhreipi kahnak ruangah zaanlam suimilam 3:30 hrawng ihsin inn a kang thok ih inn 19 a ciamral tiah Zalen in a tarlang.
September 9 zaanlam ih Thantlang khawpi ah SAC hriamkai le CDF – Thantlang kahawknak khalah SAC hriamkai pawlih meithal kahnak ruangah tualsungmi minung 4 in hriamhma an ngah ih, hriamhreipi an kahnak ruangah inn pakhat a siat tiah Khit Thit Media in a tarlang.
