Mague ramțhen Aunglan peng ih PDF guerrilla sakhan cu November 20 zing ah ralkap pawlin an nam ih Aunglan PDF company hotu a thi, mi 2 an kai tiah theih a si.
Aunglan peng Kinmonchung (ကင်းမွန်းခြုံ) khua kiangih PDF guerrilla sakhan fate cu November 20 zinglam suimilam 2:00 hrawngah ralkap 30 hrawng cun motor 2 le bike 5 thawn an feh ih an sim thu Aunglan PDF guerrilla ih Bo Lin Zung in simnak a nei.
“ကင်မွန်းခြုံ khua saklam peng 4 hlatnak hrawngih PDF sakhan fate pakhat cu ralkap pawlin an luhcilh, company hotu Bo Te Moe tiih kawhmi Ko Min Khant a thi ih, Ko Thura le La Min Nge an kai, sakhan ih puak thei thilri malte khal an la” tiah a sim.
Aunglan PDF Guerrilla cu Aunglan peng sungah Guerrilla system in ralkap do rero a si timi khal a sim bet.
Atu vekih kaih ton a sinak hi ralkap council retmi ကင်မွန်းခြုံ khawbawi ih ralkap pawl simnak ruangah a siih, thihnak tongtu company hotu le sungtel pawl hrangah ralkap kan thungrul ding tiah PDF guerrilla ih Bo Lin Zung in a sim.
