Sagaing ramțhen Shwebo distric Khin Oo peng Pințhawng khua ah October 1 zinglam suimilam 4:30 hrawngah ralkap pawl cu an lut ih meithal an kah ciamco ruangah kum 5 mi nauhak telin minung 4 an thi tiah khuami pawlin an sim.
Thihnak tongtu pawl cu kum 5 mi nauhak nunau pakhat, Ko Htun Sii (kum 35), Ko Puh Cho (kum 33), U Aung Oo (kum 45) an si tiah hmin tarlang duh lo khuami pakhat in simnak a nei.
Ralkap pawl cun PDF sakhan a um ti tahratin dalan ih thu dik lo simnak ruangah motor, bike le ke thawn tiin bur 3 ah țhen awin khawsung an lut tiah an sim.
Sun hrawngah ralkap pawl cu khawsung an suahsan hnuah an kah thatmi minung 4 ih ruak cu an sar ih, ralkap pawl cun khawsung inn pakhat an urkang hleiah Me pawl khal an that tiah tualsungmi pawlin an sim.
RFA
