October 11 ah Kalay khawpi ihsin Falam khawpi fehtu ralkap pawl cu Falam peng Lumbang khua ah October 11 zaan an riak ih October 12 zinglam suimilam 8:00 hrawngah Falam khawpi lam pan in an fehsal tiah theih a si.
Lumbang khua phunhra tlawnginn le siizung ah an riak ih, ralkap pawl cun khawsung dawr ih TV 32″ pakhat ting 4 man, siti, fang dip 2 le counter parih retmi thilri zaten an laksak thluh tiah theih a si.
Cuihleiah saktuahnak zung sungih bike 1 le desel pipa 1, khawsung ih computer pakhat, biakinn ih ret dingmi tangka pawl an lak hleiah Ar le Rampai khal an that ih an ei tiah theih a si.
Lumbang khuami pakhat in “motor 50 thawn an ra thleng, khi deuthlam ah mani ih Zawnglei ih CDM tuahtu ih sungkua an kaihmi an ret, tuizing an fehsal ding zawngah an ko, khawleng an thlen cun meithal khal an kap, thilri an laknak pawl cu inn ah um ngam loin tlantu pawl an si, an riahnak kiangkap ih inn pawl an si, tlan lo asile pakhatkhat an tuah ding khal kan țih si ko” tiah simnak a nei.
Ralkap pawl cu Var lilawn ah suimilam 11:00 tiang an cawl tiah theih a si. Falam khawpi ihsin palik motor pawl thawn an rak hmuak timi khaltheih a si.
Ref : Zalen
