Sagaing ramțhen Khin Oo peng Yuatitkung khua luhnak ih Aungme Yarthanar phungki tlawng cu November 25 zaanlam suimilam 3:00 hrawngah ralkap pawlin an siatsuah thluh hnuah cawlhnak inn 2 an urkang tiah tualsungmi pawlin an sim.
“Suimilam 1:00 hrawng ihsin ralkap pawl cu phungki tlawng an lut, suimilam 3:00 hrawngah cawlhnak inn 2, 3 an urkang, a dang inn sungih thilri le sangka pawl khal an thawi siat thluh, khawsung cu an ra lut hrih lo” tiah tualsungmi pakhat in simnak a nei.
Ralkap pawl cu Yioo, Khin Oo le Țanse peng pawl ah doawknak tuah dingin an cangvai ih sualnak neilo tualsung mipi an kai, an thawi, an thah hleiah inn pawl an siatsuah ih an urkang rero tiah tualsungmi pawl hnenin theih a si.
Khin Oo peng Yuatitkung khua cu October 22 – 24 tiang ralkap pawlin an rak cil zo ih inn 30 hrawng an rak urkang hleiah khawsung minung 2 khal an that tiah theih a si.
