Kalay – Kankaw lamzin ih Muile khua cu November 6 ah ralkap pawlin an urkang thu tualsungmi pawlin an sim.
“Inn 6 a kangfai, inn 7-nak a hrek a kang, Ar vulhnak inn 2 khal a kangfai” tiah tualsungmi pakhat in a sim.
Ralkap pawl cu khua an urkang ih Kankaw lam an feh hnu November 7 ah tualsungmi hrekkhat pawl cun ziangzat an siatsuah ih an urkang tiah zinzoinak an nei.
Khawsen ih tlansuah thluh a si ruangah thilri ziangzat an siatsuah ih ziangzat a hlo timi theih a si hrih lo tiah an sim. Ralkap pawl cu khaw luhnak ih rawl dawr ah hmun an khuarnak țum 3 a si zo timi khal theih a si.
Hmaisabik țum ah Muile khua saklam ih Yehla khua an urkang hleiah tlawng saya pakhat telin tualsung minung 3 an rak that. Țumhnihnak ah Muile khua kiang Namkha khua an urkang ih Muile khuami minung 3 khal an rak that ih mi pakhat cu minung lungput nei lo rori’n a zahmawh khal a tansak. Atu țumthumnak hi Muile khua an urkang tiah tualsungmi pakhat in a sim.
