Chin ramkulh Hakha khawpi hrambun ralkap battallion 266 ihsin kan dung baite ih CDM cangvaihnak teltu ralkap senthum Hrin Lian Piang ih Nu kum 60 ih upa le rual ban lo a farnu 2, kum 10 mi a tunu, phunsang tlangkai lai a tunu, (mi 5) cu October 11 zaanlam suimilam 2:00 hrawngah ralkap in an kaih thu theih a si.
Thilcang dan cu ralkap pawl cu Kalay khawpi ihsin Falam khawpi lam pan ih an feh laifang ah Falam peng Zawnglei khua ih um ralkap senthum Hrin Lian Piang ih Nui’ inn ah ralkap pawl an lut ih an sungkua in an kaih thluh tiah theih a si.
Ralkap pawlih kaihmi pawl cu Ralkap senthum ih Nu, Nu Khen Dim (kum 60), rual ban lo a farnu Nu Zing Tin Zam (kum 50) le Nu Thiang Za Uk Ting (kum 38), a tunu Sai Lian Thiang (kum 10) le phunsang tlawng kum 2-nak kai lai Mai Van Nei Thiang (kum 20) pawl an si. (Hminsin : Hmin pawl Kawl ih nganmi a si ruangah a dik thluh lo thei).
Ralkap senthum Hrin Lian Piang cu ralkap a luhnak kum 7 a rei zo ih zung cangantu țuanvo a kai tiah theih a si.
Kalay khawpi ihsin ralkap pawl cu motor 48 le raldonak tank 2 thawn Falam khawpi lam pan in an feh ih Kalay – Falam lamzin Lumbang khua tlawnginn le siizung ah an riak tiah theih a si. Lamzin kiangih umtu lumbang khuami pawl cu an inn ah riak ngam loim lamzin thawn a hlatnak inn pawl ah an țhawn rero tiah theih a si.
Ref : Zalen
