Sagaing ramțhen Kani peng sungah ralkap council hriamkai pawl cun February 1 ih rampi thuneihnak lak a si hnu kum kim lo nauhak sualpinak le a bur ih sualpinak a malbik țum 3 a um zo tiah tualsungmi pawlin an sim.
Sualpinak țum 3 ah sualpi tongtu nunau 4 an siih, nauhak kum 13 ihsin upa kum 45 tiang an tel tiah theih a si.
“A hmaisabik cu June thla sungah a si, a țumhnihnak cu July thla sungah a si, himi ahhin nunau 2 cu a bur rori’n an sualpi, netabik cu kan dung baite tui thla sungah a si” tiah Kani khawpi ih um mi pakhat in a sim.
Sualpi tongtu nunau pawl cu țihnak ruangah zianghman an relsuak ngam loih sii an dawh lawngah theih a si thu a sim bet.
June thla sungih sualpi tongtu nunau cu kum 26 mi Fala a si. July thla sungih sualpi tongtu nunau cu kum 30 le kum 45 mi an siih, September 16 ih sualpi tongtu nunau cu kum 13 mi nauhak a si thu theih a si.
Nunau sualpitu battallion, ziangmi ralkap, zovek minung timi zinzoi rero lai a si. Kani peng sungih ralkap council hriamkai in mi an sualpinak, mi an thahnak, inn an urkangnak, mi thilri an laksaknak pawl thawn pehparin UN ih report tuah thei dingah NUG ih Ministry Of Human Rights ah evidence thawn report tuah a si thu theih a si.
Atu khalah Kani peng lawng siloin Sagaing ramțhen peng tampi le Mague ramțhen, Chin ramkulh, Kachin ramkulh, Mandalay ramțhen peng hrekkhat cu Internet phone line an phihsak ih ralkap thazang bet tahratin mi an that, dik lo zetin mi an kai, mi thilri an laksak, inn an urkang tivek cu nitinten an tuah rero hrih lai.
Ralkap council hriamkai pawl cu tuihlan khalah tlangpar miphun umnak hmunram pawl ah nunau an rak sualpi țheu na’n a tam sawn cu thubuai tuahsaknak um loin an rak thlah zalen men tiah theih a si.
