Mon ramkulh Caihthu peng Kanni khua kiangah KNLA brigade (1) le ralkap pawl cu November 14 ah an kap aw tiah KNU țuanvo neitu pakhat in simnak a nei.
Ralkap council ih ralkap brigade 22 hnuaiih khamahyah 402, 403, 404 pawl komkhawm aw in hmunram a ra nor ruangah doawknak suakmi a si tiah a sim.
Doawknak cu suimilam pakhat tluk a siih, cui doawknak ah ralkap 6 an thi ih mi 4 hriamhma an ngah, KNLA lam ihsin hriamhma ngahtu an um lo tiah KNLA brigade (1) ih țuanvo neitu pakhat in a sim.
Doawknak a um hnuah kiangkap khua pawlih um minung 100 lenglo cu hmunhimnak ah an tlansuak tiah theih a si. KNLA brigade (1) hmunram sungah ralkap council cun ralkap thazang a bet ciamco ruangah nitinten doawknak a um thu theih a si.
October thla sung khalah ralkap le KNLA brigade (1) karlak doawknak țum 47 a um ih ralkap 95 an thi, mi 80 hriamhma an ngah thu KNU cun thuthannak an rak nei.
