Karen ramkulh Phapon distric KNLA brigade 5 Wuathukhu le Bawcuhhta hmunram ah ralkap le BGF cu November 13 ah do an tong ih mi 31 an thih thu KNLA thuthang cun an tarlang.
BGF pawl Wuathukhu khua kiang an thlen zawngah KNLA brigade 5 cun November 13 sundir suimilam 12:50 ah bomb thawn an rak do ruangah a hmun rori ah BGF mi 14 an thi ih Vigo Truck motor rang pakhat khal a let tiah KNU ralbawi cun simnak a nei. Hi doawknak ih hriamhma ngahtu BGF mi 2 khal Myinegyingu (မြိုင်ကြီးငူ) siizung ih an tuamhlawm hnuah a thi tiah theih a si.
November 13 zaanlam suimilam 3:00 hrawng khalah Bawcuhhta (ဘောကျို့ထ) lilawn ih ra fehtu ralkap le BGF pawl cu KNLA in bomb thawn an rak do ruangah mi 15 a thi tiah KNU ralbawi cun a sim.
KNLA hmunram sung luttu BGF pawl hi Bo Maung Chit ih hohami pawl an siih, Wuathukhu lam ahcun ke thawn siseh, motor thawn siseh an ra lut țheu tiah tualsungmi pawlin an sim.
Phapon distric KNU brigade 5 hmunram ih ralkap le BGF țangkop in thazang an bet rero ruangah nitinten doawknak a um tiah tualsung media cun an sim.
November 14 zaanlam suimilam 5:00 hrawng khalah ralkap le BGF pawl cu Myinegyingu ihsin Ungtaw lam ah Toyota Vigo motor 3 thawn an feh tiah an sim. Ralkap 300 hrawng an siih KNU brigade 5 hmunram sungah an feh ko ding tiah Ungtaw khuami pakhat cun a sim.
