Kachin ramkulh Moemouh (မိုးမောက်) peng ah ralkap le KIA cu November 28 zaanlam suimilam 2:00 hrawng ihsin doawknak nasazet a um tiah theih a si.
Moemouh hrambun ralkap khamahyah 437 umnak Ciankhin khua kiangah hriamhreipi kah thawmvang theih a siih, ralkap le KIA karlak doawknak a si thu tualsungmi pakhat in simnak a nei.
Ralkap battallion 437 umnak Ciankhin lam ih thilcangmi a si, hriamhreipi kah thawmvang vei 20 lenglo kan thei, ralkap le KIA karlak doawknak a si” tiah tualsungmi pakhat in a sim.
Hriamhreipi kah thawmvang theih a si hnuah ralkap 100 hrawng cu Moemouh khawpi ah an lut ih Alinkawng veng bazaar hmaiah meithal kap ciamco tahratin tualsung minung 30 hrawng an kai tiah mit hmutu pakhat in a sim.
“Doawknak ah hriamhreipi thawmvang khal a tel, cuihnuah ralkap pawl cu lamzin tluan ah meithal an kap ciamco, atu khal Alinkawng veng bazaar hmaiah meithal an kap ciamco, ral hmainortu dingah si ko ding mi 30 an kai, Lung Ja tlang lam ah an fehpi tiah kan zum, kha lam hi KIA hmunkhuarnak a si” tiah a sim.
Ralkap pawlih kaihmi lakah kum kim lo nauhak le nupinu khal an tel tiah theih a si. Moemouh peng Lung Ja tlang ah ralkap le KIA cu September 30 ah nasazet in an rak kap aw dah zo.
