Sagaing ramțhen Kalay peng thlanglam Kyanthar khua ihsin ke thawn a fehtu ralkap 25 hrawng cu Hmandaw khua lan zawngah Kalay PDF in November 23 zinglam suimilam 7:45 ah an kap ih ralkap 5 an thi tiah Kalay PDF cun thuthannak an nei.
Kalay PDF le ralkap pawl cu minute 20 tluk an kap aw ih Kalay PDF lam cu hriamhma ngahtu um lo ten dung an kirsal thei thu, Hanthawady khua ih hmunkhuartu ralkap pawl cun hriamhreipi thawn kiangkap an rak kah ciamco thu Kalay PDF cun thuthannak ah an tarlang.
November 21 zinglam suimilam 10:00 khalah ကျောက်ပြုတ် khua ih hmunkhuartu ralkap le pyo saw htay pawl cu Kalay PDF an kap aw ih Kalay PDF cun khua sung hmunram a hrek hnakih tam sawn an nor thei ko na’n ကျောက်ပြုတ် khua nitlaknak lam ဟံသာဝတီ khua ih hmunkhuartu ralkap pawl cun hriamhreipi thawn doawknak an rak bom ruangah zaanlam suimilam 1:30 ah Kalay PDF cu dung an kirsal. Doawknak ah ralkap 5 le pyo saw htay sungtel tam zet an thi ih Kalay PDF lam ihsin mi 2 an thih ve thu Kalay PDF thuthannak vekin theih a si.
