Tuini October 26 ah Taninthari ramțhen Dawai khawpi ah Pyo Saw Htay Aung Sein ih hohanak in tuah dingmi ralkap council dinpinak ah NLD party sungtel pawl cu tel fingah le nan tel lo asile kan lo kai dingih kan lo that ding tiah ralkap council in an hrinhro thu tualsungmi pawlin an sim.
“Pyo Saw Htay sungtel pawl an ra ih ralkap council dinpinak ah na ra tel tengteng pei, na ra tel lo asile nan sungkua in kan lo kai dingih kan lo that ding tiah in hrinhro hnuah an kirsal, NLD sungtel pawl hi an khamawknak hmanrua ah hman in duh” tiah hmin tarlang duhlo tualsungmi pakhat in a sim.
Cuihleiah ralkap council khalin October 26 ah Dawai khawpi ih tuah dingmi ralkap council dinpinak tel dingin NLD party cu hramhram in an ko ih nan tel lo asile kan lo kai dingih kan lo that ding tiah an hrinhro thu NLD party sungtel pakhat in a sim.
Cuvek thotho in Yiphyu peng sungih ralkap thawn naite ih ummi khua mipi pawl cu Dawai khawpi ih tuah dingmi ralkap council dinpinak tel dingin ralkap council ih retmi khawbawi pawl cun hringhro phah in an sawm vivo tiah theih a si.
