2021 October thla ihsin 2022 March thla tiang thla 6 sung hman dingmi budget cu ralkap council in an tuah ih thuthannak an nei cih.
Ralkap in rampi thuneihnak an lak hnu hmaisabik tuahmi budget cu kilhimnak hrang hman dingah billion 1700 lenglo tiang an hman ding thu thuthannak ah an tarlang.
Himi hi rampi huap thlahlawh peknak lam thluh in a tam bikmi budget a si. Thla 6 hrang budget ah billion 9000 lenglo hman ding a si tikah budget zate ih zatek 15 hrawng cu ralkap in an hmang ding.
Asina’n ralkap council ih thuthang suahnak lam hotu General Zaw Min Htun cun himi hi a liam zomi kum hnakin ralkap hman ding kan niamter tiah a sim.
2018 ah thla 6 hrang budget zohsal tikah ralkap hman ding cu billion 1300 lenglo an rak dil timi hmuh theih a si. Curuangah a ra lai dingmi thla 6 sung ralkap hman ding budget cu 2018 hnakin a tam sawn.
Doawknak a um vekin hriamhrei thilri leinak ah ralkap council in kilhimnak lam hman ding budget a dilmi cu a danglam ciamco lo tiah ramkhel zoh thattu pawlin xn sim.
Thla 6 budget sungah a danglam zetmi pakhat cu fimthiamnak lam hman dingah billion 1000 hmang dingin an siang ih, harhdamnak lam hrangih hman dingmi hnakin a tam sawn.
Harhdamnak lam hrangih hman dingmi cu billion 500 lawng an ret ih, Covid – 19 fund billion 100 thawn kom tikah billion 600 lawng a si.
