Ralkap council in remdaihnak thu reltlang dingih sawmnak an tuahmi parah Tlangpar miphun hriamkai tamsawn in an el
February 12 sun ih thleng dingmi Myanmar rampi Union Day khawmpi le sankhuk remdaihnak hrang thurelkhawmnak neih dingmi ah Tlangpar miphun hriamkai zaten tel cio dingah Ralkap council ih sawmnak thawn pehpar in NCA hminkhengtu Tlangpar miphun hriamkai pawlih hmuhdan cu a hnuailam vekin an si.
KNU ih Ramleng tlangbawi ပဒိုစောတောနီး cun,
Hi thu thawn pehpar in kan nih cun zianghman sim ding kan nei lo. Ziangruangah tile kan nih cu kan fehnak ding lamzin felfaiten kan nei cia thluh zo. Annih Ralkap council thawn ziangthu hman ah biakawk ṭul a um nawn lo. Hmailam pan ih kan feh rero lai ah dunglam kirsalnak ding thu lamlam an tawlrelmi cu ziangti lam hman a ngah nawnlo bepbep a si. Ralkap council thawn thurel tlang, rualremnak tuah tlang, biakawk timi hi kan khawp tuk zo, tui’ ṭum khal zianghman a danglam cuang ziklo, tiin a sim.
CNF ih thuphuangtu Salai Htet Ni cun
Tu ah Ralkap council in NCA ih hminkhentu Tlangpar miphun hriamkai le pawlkom thawn thurelkhawm ding timi cu ziangbik saw kan rel ding. In sawmnak san khal thu mumal umlo mi a si. NCA lamzin timi khal pawlkom 5 kawmkhawmmi Tlangpar miphun hriamkai, Ralkap council, Political party, hluttaw le cozah ti a si ih himi pawlkom 5 lungrualten kan kawmawk lawngah NCA lamzin a si thei ding. Asinan tu ahcun cozah khal a um lo, hluttaw khal a um lo, Political party khal a umlo ruangah NCA lamzin in kan feh ding tiih sawmnak cu a taktak ahcun zianghman a danglam cuang ziklo, mipi le international ih rak hmuhnak ih thiamco duh men ih an tuahmi a si ko ding, tiin a sim.
KNPP/KA Secretary ဦးအောင်ဆန်းမြင့် cun
Ralkap council ih sawmnak thawn pehpar in kan ni lam cun zianghman timtuahmi a um lo tiin ka sim duh. Ziangruangah tile tui’ṭum dothlengnak ah hi cun tumtahmi felfai nei in kan tel zo. NCA sirhsan in sankhuk remdaihnak kan tawlrel ding timi cu NCA ah kan nih kan tel nawn lo. Cuvial si a si ko.
Cun a dang pakhat leh cu kan nih Tlangpar miphun hriamkai lam in Ralkap council thawn pehtlai aw in remdaihnak kan relpi asi ahcun, apakhatnak ah Ralkap in thuneihnak an lakmi cu kan theihpi tinak khal a si dingih kan mahsawn in Ralkap thuneihnak a hnuk kan sauter tlun ah 2008 danhrampi cu nung dingin kan tuah rero ti thawn a bangaw ding. Curuangah kan ni lam ihsi cun Ralkap council ih sawmnak remdaihnak thu relkhawm ding timi cu a ruah khal kan ruat lo lawlaw a si bik, tiin a sim peh.
AA thuphuangtu ခိုင်သုခက khalin hi thuthawn pehpar in zianghman sim theimi kan nei lo. Kan nih cu official ih sawmnak khal a um hrih lo. Cun saklam tlangpar miphun hriamkai pawlkom khalin relkhawmnak kan tuah hrih lo. Tu hrih ahcun zianghman a sia a ṭha reltheimi ka nei hrih lo, tiin a sim. Shan ramkulh saklam ih hrambun Tlangpar miphun hriamkai kawmkhawm AA TNLA le MNDAA cun hi Ralkap council ih sawmnak ah an tello ding, official ih sawmnak khal kan dawnglo, tel khal kan tello ding, tiin TNLA GS General တာဘုန်းကျော် cun a sim ve.