Covid – 19 thuahthumnak in nasazet ih a thawinak Yangon ramțhen thlanmual pawl ah nikhat ruak 3000 vui theinak ding meiphu 10 cu a rualin kan sak tiah ralkap council neihmi MRTV ahcun July 27 zaan ah an phuang.
Yewai thlanmual ih sakmi ong nga, pahnih tlar (ငါးပေါက်တွဲ နှစ်တွဲ) meiphu 5 sak thluh a si ahcun ruak 50 cu suimilam pakhat sungah ur thluh thei a si dingih, nikhat ah ruak 1000 vuiliam theih a si ding tiah an sim.
Cuvek thotho in Yangon ramțhen sipin committee cun Yangon ramțhen sung thlanmual pawl ah ong nga, pahnih tlar (ငါးပေါက်တွဲ နှစ်တွဲ)meiphu 10 cu a rualin an tuah ih, cumi pawl an tuah țheh ahcun nikhat ah ruak 3000 lenglo vuiliam theih a si ding thu MRTV ahcun an tarlang.
Ralkap council ih harhdamnak tlangbawi zung cun Covid – 19 positive le thihnak tongtu pawl cu nitinten an phuang ko na’n an phuanmi hnakin a taktak ah a tam sawn thu sii thiam pawl le zatlang hnațuantu pawlin an sim.
