Ralkap Council In Daw Aung San Suu Kyi Le U Win Myint Cu Thubuai An Orhter Bet

Rampi thuron Daw Aung San Suu Kyi le president U Win Myint telin minung 16 cu hrilawknak dik lo thuhla ah pehtlaih awknak an nei tiin November 15 ah thubuai orhter an si thu ralkap council ih UEC cun thuthannak an nei.

Thubuai orhtermi pawl cu tuihlan acozah ih UEC chairman U Hla Thein, UEC sungtel U Myint Naing le U Than Htay, acozah office ih Minister U Min Thu, Mandalay ramțhen CM Dr. Zaw Myint Maung le Naypyitaw council chairman Dr. Myo Aung pawl an tel tiah thuthannak ahcun an tarlang.

Ralkap in rampi thuneihnak a lak hnuah UEC sungtel pawl cu thubuai a orhternak thuhla hi hmaisabik an phuanmi khal a si. Ralkap council UEC cun thubuai orhtermi mipum 8 hmin cu an tarlang ih ziangmi pukmah hmangin thubuai an orhter ding timi an tarlang lo.

2020 rampi hrilawknak ah NLD cun nehnak a co sal ko na’n, vote cazin dik lo a um ruangah vote dik lo a um thei timi puhmawh hawlin ralkap in rampi thuneihnak an lak hnuah hrilawknak result cu kan țhiatbal a si tiah thuthannak an nei.

Cuihnuah ah hrilawknak tinten nehnak cotu NLD tlakniamnak ding le ralkap council duhtu party pawl hluttaw sung an thlen theinak dingah PR hmangin hrilawknak tuah dingah ralkap council le UEC cun an tawlrel rero.

Atu ahhin Daw Aung San Suu Kyi cu case 11 thawn thubuai an tuahsak hleiah president U Win Myint khal case 2 thawn thubuai an tuahsak.

Leave a Reply

Your email address will not be published.