Sagaing ramțhen Kalay peng Țhohkyan khua uksuh Tharyargone khua ahcun October 8 zinglam ah motor 50 hrawng thawn ralkap 150 hrawng cu khawsung ah thil hawlmi nei bangtukin an lut ih khawsung inn le Fang rialnak cetzung, Ar hmuan pawl an urkang hleiah bike 2 an laksak thu tualsungmi pawl hnen ihsin theih a si.
Tharyargone khua cu Kalay – Kankaw lamzin ah a um ih, ralkap pawlin khawsung an siatsuahmi pawl cu bike remnak dawr, Thiha Htun cetzung (2) neitu ih tlakrawh inn pakhat, hnațuantu pawl umnak inn, ekinn le congarate hnațuantu pawlih umnak inn pawl an urkang hleiah khawsung ih bike 2 khal an la tiah theih a si.
Tualsungmi pakhat in “October 7 zaan ihsin khawsung ah ralkap le PDF an kap aw, tu ahhin kum 40 hrawng minung Pu Sen Ceu le a inn ih ra lengtu mi pakhat an kai, inn leng nan suak lole kan lo kap ding tiah an hringhro, khawsung mi pakhat khal a ke ah an kap, curuangah mizaan ihsin kan tlan thluh, khawsung ahcun mi malte lawng an tang, tuizing (October 8) ah Kalay ihsin ralkap le palik pawl an ra ih khua an ur, mi pakhat khal an kai, an zaten sualnak nei lo hlirte an si, Tharyargone khua kiangkap ih bomb a puak țheu ruangah khawpi sung feh asikhalle khawpi luhnak gate ah Tharyargone khua tiih sim cun hleice zetin mi an cek ciamco, nan khua kiangkap ah bomb a puak țheu ti aw, hriamhreipi kan nei, kan lo kap ahcun nan tuar ding tiah mi an ti” tiah a sim.
October 7 ah ralkap burpi feh motor cu Tharyargone le Kalay khawpi GTI tlawng kiangah bomb thawn țum 2 an do ih ralkap 10 an thi tiah Kalay PDF cun thuthannak an nei.
Ref : Zalen, RFA
