Sagaing ramțhen Țanse – Yioo lamzin Cuaisuai (ကျွဲဆွဲ) khua kiangih ralkap council check gate cu PDF in November 15 zaanlam suimilam 3:00 hrawngah bomb thawn an do ih ralkap 6 an thi tiah theih a si.
Ralkap pawl cu lamzin sukso pawl an check ih tangka an dil, cu vekih an um rero laifang ah bomb a puak ih ralkap 6 hnakih tam an thi ih hriamhma ngahtu khal an tam zet tiah tualsungmi pakhat in a sim.
Hi bomb puak cu Țanse PDF ih tuahmi a siih, PDF lam ihsin hriamhma ngahtu um lo ten dung an kirsal thei thu, ralkap pawl nasazet ih do vivo ding a si ruangah mipi lam dinhmun in poimawh țul tuk lo ahcun lamzin ah sukso lo dingah Țanse PDF cun mipi hnenah dilnak an nei.
Hi bomb puak ih thihnak tongtu ralkap pawl cu Monywa ralkap siizung ah an fehpi tiah theih a si.
