NUG in ni 100 sung hnațuannak ah ralbuainak hmun telin a țulnak hmun pawl ah sumpai million 715.4 bomnak an pek thu tlangthannak an nei.
NUG ih milai zawnruahnak le phuhrin harsatnak lam khawkhannak tlangbawi zung ih tlangthannak ahcun April 16 – July 24 tiang ralbuainak Mindat, Kareni, Phekhung, Phalu, Kinma (pauhp), Cungpio telin rampi huap ih a țulnak hmun pawl ah bomnak an pek thu simnak an nei.
Myanmar ram sungih raltlan pawl, khua suahsan ih harsatnak tongtu pawl, ralkap ih dekcok ruangah harsatnak tongtu mipi pawl bom theinak hrangah a țul dan vekih bomnak pe suak thei dingah NUG cu International pompinak ngah thei dingin tlangpar miphun pawlkom, zatlang pawlkom, ram sung hrambun acozah a silomi pawlkom, leitlun killi ih a thlengmi Myanmar pawlkom pawl thawn thurel khawmnak țum 26 neih zo a si timi khal an sim cih.
Cuihleiah CDM teltu innsang 667 bomnak hrangah a țumkhatnak sumpai hmanmi million 69.5 le Covid – 19 thuahhnihnak ih acozah hnațuan Covid – 19 tuartu pawl hleice bomnak tiin innsang 26 hrangah million 2.6 bomnak pek a si thu khal an sim tel.
