Misual ber pawh ni mah ila Pathian chuan ang khat vek in min en a, kan thil tihsual te sim a, a hnen kan pan chuan hmangaih taka kuangkuah in min lo ngaidam thin.
Puitling film tam tak lo chang tawh tu Joshua Broome chuan a pianthar dan chungchang a sawichhuak a. Kum 5 chuang zet he industry tenawm taka a tan hnu ah a nun chu chhanchhuah a a awm thu hlim takin a puang ve thei ta.
Joshua Broome hi a hming lem atan Rocco Reed hmangin puitling film 1,000 aia tam ah a inlan tawh. 2012 khan puitling film a chan thin hi a bansan tih a sawi a, tunah chuan nun hlimna tak tak a chhar tawh a ti.
Kum 23 a tlinah Broome hian lemchan khawvel luhchilh a actor hlawhtling nih tum in Hollywood, Los Angeles a pan a. A beisei ang erawrh in alo awlsam lo. Mitam tak, a bikah hmeichhia te chu hmu kual in a thil tum chungchang te a han hrilh hnu ah, a mi hmuh thin te chuan puitling film siam turin an lo kawhhmuh zel ani.
Puitling film a siam a nih chuan actor hlawhtling tak a nihna tur kawng hawnsak in thil a awlsam hle tawh thu an hrilh a, an thusawi te chu lo awih sak in puitling film chang tur chuan thutlukna a siam ani.
Puitling film a chan chhoh hnu ah chuan actor hlawhtling tak nilovin chu industry bawlhhlawh taka mipa lar ber ah a tang zui ta zawk. Pawisa tam tak hlawhchhuak mahse nun hlimna a nei chuang lo. “Pawisa tam tak thawkchhuak in ka duhna hmun a piang ah ka zin kual thei. Mahse chu chuan hlimna tluantling min pe lo. Ka chhungril chu lungaihna in a khat a, a ruak vek ani” a ti.
New York Post hnen ah a duhthlan loh lam kawng a zawh vang hian mahni intihlum duhna hial a nei thin a, thil engkim mai chu dawt leh phuahchawp a ni tiin “ka nihna dik tak chu ka hloh ani” a ti
Mahse 2012 khan vanneihthlak tak in a sal tanna industry atang chuan a chhuak a, hemi hnu hian a nun chu ngaiawh a siam tha turin kum 2 lai a bei a, Gym ah te midangin an hriat loh nan hna a thawk thin. 2014 khan hmeichhe pakhat Hope nen an intawng a. Hope chuan a hun kal tawha a thil lo tih te haider sak in a nun beidawnna ruam atangin a chhanchhuak.
Hope kiangah Broome hian a hun tam tak hmangin biakah ah an kal dun fo thin. An inkarah chuan induhna a piang ta hial a, 2016 a an inneih hma in Broome chuan Biblical theology a zir nghe nghe. Pathian a harhna a chan hnu ah a nun chuan ngaiawh chho in tunah chuan Hope nen l chhungkaw hlim tak din in fa an nei tawh.
Broome hi Cedar Rapids, Iowa a Good News Baptist Church ah Pastor in a awm mek a, US leh a chheh vel hmun hrang hrang ah Pathian thu hril in a fehchhuak thin bawk. Hun kal tawh chu hun in a liam pui tawh a, tun hun hi a pawimawh ber chu a ni. Hmasawn tura rahbi i chheh nan khua ala tlai lo.
