Prince Harry chuan a ma mimal chanchin tarlanna lehkhabu ‘Spare’ chu chhiar theih turin a tlangzarh a, he a lehkhabu ah hian a mimal chanchin mai piah lam ah a kalsan tak lal chhungkua te nen an inkar te a tarlang tel bawk.
‘Spare’ lehkhabu ah hian Prince Harry chuan a thisen zawm lal chhungkua nen an buaina te pawh a zep lem lo a, a unaupa Prince William nen an inkar a buaina thleng te a puang bawk.
The Telegraph hnen a Interview a neih ah Prince Harry hian a lehkhabu chhuah tur a a ruahman vek tawh atangin phek 400 lai a paih then tih a sawi a, draft hmasa a siam zawk chu a danglam in phek 800 lai a tam a ni. Mahsela khawvel in a zawng zawng an hriat a duh loh vangin a paih then a ni tih a sawi.
Phek hmasa a paih zawng zawng nen phei chuan Prince Harry hian lehkhabu 2 lai a chhuah thei niin a hrilh a, amaherawh chu a chhungte a hmai zah vang leh a chhuah lui a nih chuan a pa leh a unaupa ten engtik ah mah an ngaidam thei tawh ngai lovang a ti.
“Thil engemaw tak thleng a awm a, a bik takin kei leh ka unaupa inkarah te, hei bakah kei leh ka pa inkarah te, khawvelin a hriat ka duh loh vang chauh a ni. A chhan chu ka puang a nih chuan min ngaidam tawh ngai dawn lo” tiin Harry chuan a sawi bawk.
‘Spare’ hi thawnthu phuahchawp nilo lehkhabu chhuah tawh zingah chuan hralh chhuah chak ber a ni hial a. United States, Canada leh United Kingdom-ah copy maktaduai 1.4 chuang hralh a ni tawh.
January 10-a tihchhuah a nih khan he lehkhabu hian thupui tam zawk a zirchiang a, mipui mit hmuha seilianin harsatna a tawh dan te, a nupui Meghan Markle-i chunga thleng te pawh a tel. Prince Harry leh Meghan te hi May 19, 2018 khan an innei a, fa pahnih Archie leh Lilibet te an nei. January 2020 khan an nupa hian lalchhungkua a an hna leh chanvo aṭangin an inhnukdawk a, hemi hnu hian California, US-ah an insawn a ni.
