Ralkap in rampi thuneihnak an lak February 1 zingah rampi president U Win Myint ih room sungah ralbawi pawl an lut ih president bansan dingin an fial thu October 12 ah Naypyitaw thuțhennak zung ahcun president U Win Myint in a simsuak.
February 1 zinglam nazi 5:00 ah president U Win Myint cu a inn ah an kai ih ralbawi 2 cun president U Win Myint cu harhdamnak lam puhmawh in president bansan dingah an dil thu simnak a nei.
President U Win Myint cu a harhdamnak a țhat ruangah a bansan thei lo thu a sim ih na bansan lo asile upa dinhmun in siatsuah na tong thei tiah an ti thu thuțhennak zung ahcun a simsuah thu president U Win Myint ih sihni pakhat in simnak a nei.
“U Win Myint khalin president bansan thei lo ruangih upa dinhmun in siatsuah ka ton a si khalle ziangtitha, ka thi ko men pei tiah ralbawi pawl a ti thu thuțhennak zung ahcun a simsuak” tiah sihni in a sim. Ralkap ih an kaih caan ah ralbawi pawl cu thuneihnak lak a țhat lo thu le daan thawn mil aw in tuah ding a țhat thu U Win Myint cun a sim thu khal sihni cun a sim bet.
Ralkap council sihni pawl cun U Win Myint cu NUG, CRPH, PDF pawl an din thu na thei maw timi thusuhnak ah U Win Myint cun hi caan ah a leng ah ka um nawn loih kaihmi ka si zo ruangah ka theilo tiah a let
NUG, CRPH, PDF pawlih hnatuan dan thuhla a suhsal tikah president U Win Myint telin thubuai tuahsakmi sihni pawl cun hi thuhla cu thubuai thawn a pehpar lo ruangah suh ding a si lo tiah an el.
October 12 ih thuțhennak zung fehmi cu NLD CEC ih thuthanmi pahnih cun rampi a siatsuah tiah pukmah 505(b) thawn U Win Myint le Daw Aung San Suu Kyi, Dr. Myo Aung pawl cu thubuai an rak tuahsakmi thuhla a si.
