Tumna a awm phawt chuan kawng a lo awm ngei zia Bihar, Bhagalpur a cheng kum 42 mi Kamal Kishor Mandal atang hian a chiang khawp mai.
Kamal Kishor Mandal hi Political Science ah graduat a ni a, amaherawh chu chhungkaw lam a sum harsatna vangin zir zawm thei lovin kum 23 a nih ah 2003 khan RD & DJ College, Munger ah security guard in hna a thawk a ni.
Mahse RD & DJ College, Munger a hna a thawh hnu ah Ambedkar Thought and Social Work department, Tilka Manjhi Bhagalpur University ah a insawn a, 2008 khan security guard hna atangin peon ah a inthlak.
Peon ang a hna a thawh lai hian zirlai dang ten lehkha an zir a hmuh in rual a awt hle a, University a thuneitu hnen ah dilna thlen in authorities ten 2009 khan phalna an pe. Tichuan Kamal hian Ambedkar Thought and Social Work ah post graduation course admision chu pek a ni a, peon hna a thawh chu bansan chuang lovin lehkha zirin theihtawp in a bei.
Harsa leh dinhmun khirh tak atang in kawl a eng chho tial tial a, Master a zawh hnu ah 2013 khan Ph.D course ah a inziaklut leh a, 2017 a thesis a thehluh hnu 2019 alo herchhuah chuan degree a nei ve thei ta a ni.
National Eligibility Test (NET) zawng zawng a paltlang vek hnu ah chuan zirtirtu hna thawh tur a dap kual a, 2020 khan Bihar State University Service Commission chuan a hna lo thawh tawhna Tilka Manjhi Bhagalpur University ah Assistant Professor hna a awm tih an tar a, Maldal pawh hian hna chu thawh tumin dilna a pe lut.
May 2022 a result puan a nih chuan peon a alo thawh thinna ngei hmun ah Assistant Professor in a tling tih hriat a ni a. Times Of India in a tarlan danin Mandal pa hi kawngsir a thingpui zuarin a inhlawh a, hetiang hian chhungkua a chawm.
“Ka zirna ah hian kan retheihna leh kan chhungkaw harsatna te hi kawng min dal sak turin ka phal lo. Zingah class ah ka kal a,chawhnu ah duty in zan lam chu class a kan thil zir tawh te ennawn nan ka hmang thin” tiin Times Of India te a hrilh a ni.
