Sagaing ramțhen Tamu khawpi myoma palik zungih hnațuantu palik senhnih Wai Yan Soe (private number လ – 269461) cu palik zung hotu police captain Aye Min Thein ih fialnak vekin dothlennak thuhla zingzoi dingah rittheihsii tham tahratin India – Myanmar ramri hmun pakhat a thlen laifang November 20 ah Tamu PDF in an kaih thu November 24 ah Tamu PDF battallion (1) cun thuthannak an nei.
Palik senhnih Wai Yan Soe cu thuhla cipciar an suhfel ih Tamu khawpi ih ralkap council le pyo saw htay pawl, midang hriamkai thawn țangkop in sualnak neilo mipi kaih le tangka dilnak, thuhla um loih mi thahnak tivek pawl a tuah thu a phuang suak.
Cuihnuah Tamu PDF battallion (1) cun Tamu khawpi ih ralkap council le a tefa pawlkom pawl, minung pawl, an pehtlaihmi minung pawl thuhla famkim zingzoi ih an theihsuak hnuah ralkap daan pehtlaih Geneva ih daan tuahmi vekin țuanvo neitu pawl hnenah palik an kaihmi cu daan vekin an ap.
Neta ih thuhla theih vek asile palik kaihmi cu Moreh khawpi ih țuanvo neitu pawlin Tamu khawpi ih ralkap council hnenah an ap sal zo tiah theih a si.
