Mague ramțhen Pakukko khawpi veng 15-nak uktu U Kyaw Myint Than inn cu tuini July 26 sundir suimilam 12 ah Pakukko G-Z cun bomb 2 an den thu G-Z sungtel pakhat in simnak a nei.
Hi bomb puak ruangah inn thilri hrekkhat a siat ih, ralkap hnenih thuhla na sim ruangah mipi kan him loih nang khal na him ve lo timi kan langter duhnak a si tiah G-Z sungtel pakhat in a sim.
Pakukko G-Z cun mipi harsatnak tuar dingin a tuahtu dalan le Pyo Saw Htay pawl kan thianfai ding ruangah mipi lam ihsin a țul lomi ah leng sukso lo dingin le G-Z thawn tongaw in zuk pawl zuk tlang lo ding, G-Z hmuh tikah hmu lo vekih um men dingin thuthannak an tuah.
Cuvek thotho ih Mague ramțhen Taungdwingyi penguk inn khal tuini July 26 zinglam suimilam 4:00 hrawngah bomb a puak tiah theih a si.
Penguk inn kiangih um mi pakhat in “zingpitte ah thawmvang kan thei ih leng suak in kan zoh tikah penguk inn cu meikhu hlir a khat, ziang a cang timi cu kan theilo, ralkap an ra ih lamzin a phit, mi sukso an cek” tiah simnak a nei.
Hi bomb puak thawn pehparin Taungdwingyi peng Bih-tah-nu PDF in kan tuahmi a si tiah thuthannak an nei. Bih-tah-nu PDF hi peng 5 komkhawm in dinmi a si thu theih a si.
Information director Lieutenant (bokhat) Thang Htut in “lungrual in thazang a cakmi ralkap si dingah Mague, Myotit, Natmouh, Taungdwingyi le Sinpaungwine khawpi pawl ihsin PDF kan komkhawm aw ih ‘Bih-tah-nu People’s Defense Force’ kan din” tiah simnak a nei.
