Kum 65 a upa Indiana pastor chuan kohhran mipui hma ah a chetsualna puangchhuak in Pastor a nihna dinhmun atang in a bangzui tih hriat a ni.
Pastor John Lowe II hian Warsaw, Indiana a New Life Christian Church ah mipui hma a thu a sawi ah chuan kum eng emaw zat liam tawh ah khan hmeichhe tleirawl kum 16 nen inngaihna sualah a tluk thu a puang a, a hming leh a nihna erawh puang lo mahse biakin a inkhawm ve a tuartu hmeichhia ngei chuan dawhsan ah va lawnchilh in Pastor chu a sual a in puan tir ani.
Kum 20 liam ta khan uirena ah a tluk luh thu hi Pastor Lowe II hian a sawi a, kohhran mipui pungkhawm te hma ah ngaihdam a dil zui. Mak an tih em vangin standing ovation hial a hlawh.
Hetih lai hian kum 43 a upa hmeichhe pakhat Bobi Gephart chu a pasal Nate nen dawhsan lam pan in Pastor hnen ah chuan a uire lo a, a thianghlim chu a laksak zawk tih a sawichhuak ani.
Bobi chuan thil thlen lai khan tleirawl lek a la ni a, kum 27 liam tawh a thil thleng vang hian a nun chu nasa taka tih hrehawm a ni a ti. Pastor chhungkua te a venhim nan hian dawt a sawi a, dam thlakhlelh lohna hial a neih phah. “Kum 16 ka nih laiin i office ah ngei ka zahawmna leh thianghlimna min tih bawrhban sak” tiin Pastor hi hmaichhan ah a chhuahchhal ani.
Bobi hian Pastor chu tuartu nilovin amah zawk chu tuartu a nih tih huai takin a puang. A pasal Nate pawh in a nupui chunga Pastor thil tih chu uirena nen chuan thil danglam hlak a ni tih a sawi ve bawk a, a nupui thi leh zungbun a pek te pawh phochhuah ani.
Nate te nupa dawhsan atanga an chhuk hnu hian mipui te an thinrim hle a, kohhran mipui te chuan thil thleng ah hian a ka ngei a insawifiahna nei turin an phut. He thil thlen hnu hian Pastor John Lowe II hi a nihna dinhmun atang hian a bangzui a, a laka hremna tur thuchhuah erawh engmah siam ala awm lo.
