Chin ramkulh thlanglam Matupi peng Ngaleng khua ih pastor pakhat cu ralkap council hriamkai pawlin September 23 ah an kaih thu tualsungmi pawlin an sim.
Ngaleng khua ih CDF – Matupi le ralkap council hriamkai pawl kahawknak a thlen hnu ralkap council hriamkai pawl cu khawsung an dap ih Thangvel local kawhhran pastor Ngai Kung ih phone sungah meithal zuk an hmuh ruangah an kaih tiah an sim.
“Mino pawl thawn an kap aw, cumi ah tualsungmi hrekkhat an kai, Saya Ngai Kung telin mi 5 an si, phone an ceksak ih minung 4 cu zianghman an hmuh lo ruangah an thlahsal, Pastor Ngai Kung ih phone sungah cun a ram tawih phah ih a zukmi meithal zuk an hmuh ruangah ralkap battallion 140 in an kai” Ngaleng khuami pakhat in a sim.
Pastor Ngai Kung cu Covid – 19 Respone Committee sungtel pakhat a siih, an thlah zalen salnak hrangah kawhhran komkhawm pastor pawlin ralkap hotu (ဗျူဟာမှူး) tong in thurelpinak an nei ding tiah theih a si.
Phanaing le Ngaleng khua karlak hmun pakhat ahcun September 23 zaanlam nazi 2:00 hrawngah CDF – Matupi le ralkap council hriamkai cu nasazet in an kap aw ih zaanlam nazi 5:00 hnu lam ihsin Ngaleng khua mipi cu hramlak ah an tlan thluh deuh thaw tiah theih a si.
Matupi peng Ngaleng khua cu inn 100 hrawng an siih Matupi ihsin bike thawn nazi hrek tluk fehnak khua pakhat a si.
Matupi peng ahhin ralkap thuneihnak dokalh cangvaihnak le CDM cangvaihnak pawl cu puhmawh in minung 15 (Matupi khawsung mi 10, khawte mi 5) an kai ih tuini tiang an thlahsal hrih lo tiah theih a si.
