Taninthari ramțhen Lapuattha PDF hnenah beutu CDM palik Kyaw Ko Ko cu a liam zomi ni 14 ah sakhan ihsin a hlu ngahmi tangka pawl la tahratin Hlaingthayar palik zung ah a ap awk thu theih a si.
Palik Kyaw Ko Ko cu Lapuattha peng Pinsalu palik zung hmunram Hluaiza khua le Depinkai khua ah țuanvo nei ih hnațuantu a siih July 20 ihsin CDM a lut thok.
“Anih hi a thok ah CDM tuah ih Yangon ah a relh thu a rel, Yangon ih um a remcang lo tiah DKBA sakhan pakhat ah a beu, cutawk ihsin Likihkaw (လေးကေ့ကော်) lam ah a thleng, a thlen veten midang CDM luttu pawl a pehtlaih ih a ko, kawh ngahmi a nei maw timi cu kan thei lo, cumi ahcun mipi pawl pehtlaih ih a hlu a dil hleiah peng sung minung pawl hnenah CDM a tuah thu, mipi pawlih bawm dingin phone thawn a hlu dilnak a nei” tiah Lapuattha PDF țuanvo neitu pakhat in simnak a nei.
Palik Kyaw Ko Ko (private number လ – 251127) cu hmaisa ah ထောက်ကြံ့ palik zung ah a ap aw tiah theih a si. Atu ahcun Hlaingthayar palik zung ih a ap awk thu palik Kyaw Ko Ko lam ih mi pakhat cun a sim.
“Anih hi tuihlan ah နယ်ထိန်း țuantu a si, a hnațuannak hmun pawl cu sumdawnnak țha zet Casino tamnak hmunram a si, milian tamnak khua pawl ah hna a țuan, cumi pawl tlansan in CDM a tuah timi kan thei cu kan theih ihsin kan zum lo cia” tiah simnak a nei.
Anih hi a țongkam a țha zet ih mi kom dan a thiam, asina’n hitawk a thlen ihsin atu vek dinhmun a thleng ding timi kan zum ih ralringten kan pehtlaih tiah Lapuattha PDF țuanvo neitu pakhat in a sim. Lapuattha PDF cun palik Kyaw Ko Ko ruangah khawpi sungih minung pawl dik lo zetin an kaih ding kan duh lo tiah PDF țuanvo neitu cun a sim bet.
