Sagaing ramțhen Pale peng Cawngwundo khua ihsin kirsaltu ralkap council hriamkai pawl cu tualsung hriamkai pawlin November 25 zaanlam suimilam 1:00 ah an do ih palik 2 an thi tiah Pale PDF hotu Bo Naga in simnak a nei.
“Hi pawl hi Kandawng khua saklam Cawngwundo khua cu an hringhro ciamco ih an tlunsal cu kan hngak ih kan kap, khatlam khatlam kahawknak cu minute malte lawng a si, annih lam hi palik 2 an thi” tiah Bo Naga in a sim.
Kandawng khua tlawnginn ah ralkap le palik pawl hmun an khuarnak thlahnih zikte a si zo tiah a sim bet. Cuihleiah Cawngwundo khua ih inn pawl khal ralkap pawlin November 15 ah an urkang tiah an urkang timi khal a sim.
