Film Industry a chawimawina ngaihhlut hlawh bera sawi Oscars Award 2022 semna ah ‘King Richard’ Actor, Will Smith chu comedian Chris Rock laka tharum thawh zawnga a chet vangin sawiselna tam tak a awm phah.
Comedian, Chris Rock hian Stage a Award dawng tur hming a puan dawn laiin Will Smith nupui Jada Pinkett-Smith sam chungchang chu fiamthu thawh nan a hmang. A lu kawlh chu G. I. Jane nen lo tehkhin in a film dawt leh siam turah hmuh a beisei thu a sawi ani.
Fiamthu thawh nan a a nupui hman a nih vang hian Will Smith chu a thuthmun chhuahsan in dawhsan lam a pan phei a, stage a lo ding mek Chris Rock chu a va beng chawrh. A thut hmun ah kir lehin a nupui hming chu hnaisai lo taka lam lo turin a khak zui bawk.
Will Smith chet dan hi dem a hlawh viau laiin thenkhat erawh chuan a nupui chhan nana mipa taka a chetchhuah ngamna vangin pasal tha tia fak tu an awm nuk a. Mahsela mipui tam tak hma a tharum thawh zawnga a chetchhuah vangin a thiam lo hrim hrim ti tawk an awm bawk.
Mipa lemchan thiam ber nihna ‘Best Actor’ award a dawn pawh a phulo tiin Academy te hnen ah a Award dawn hi chhuh a pe kir leh tura ngenna tam tak a awm hial ani.
Academy lam pawhin thuchhuah rawn siam ve nghal vatin tharum thawh zawnga chetna chu engti kawng maha an pawmpui theih loh thu an puang. Will Smith lakah hian engtin nge hmalak a nih dawn sawi a la nilo a, Chris Rock leh Academy atang in engmah Will Smith lakah report thehluh a la nih loh thu LAPD ten an tarlang bawk.
