NUG thawn tong aw in thurel cu kan cohlang thei lo tiah ralkap council cun October 23 ah thuthannak an nei.
Ralkap in rampi thuneihnak an lak hnu rampi dinhmun le ASEAN Myanmar palai thuhla ah ralkap council ih News & Information department ih thuthannak ah NUG, CRPH, PDF thawn thurel tlang ding an duh lo thu an tarlang.
NUG၊ CRPH၊ PDF pawl tha petu ram le pawlkom pawl khal thlun ding daan tuahmi parah thusuhnak tuah țul dinhmun a si tiah thuthannak ahcun an telhcih.
NLD acozah ih hrilawknak ah thil dik lo a um tiah puhmawh in February 1 ah ralkap cun rampi thuneihnak an lak. Asina’n hrilawknak result lawng mipi in an cohlang ih ralkap in thuneihnak an lak hnu ni reilote ah rampi huap in dokalhnak a suak.
Ralkap thuneihnak dokalh ih duhphorhnak tuahtu pawl cu meithal thawn an țhekdarh, an kai ih an hrem ciamco ruangah October 23 tiang mi 1196 an thi zo. Kaih tongtu mi 9175 an siih atu tiang mi 7016 cu thawnginn sungah an um lai. Cuihleiah kai dingih warrant an pekmi khal mi 2000 hrawng an si tiah AAPP ih hminsinnak ihsin theih a si.
Ralkap council cun tlangpar miphun hriamkai (EAO) pawl, ramkhel party pawl thawn tonkhawm thurelnak lawng kan tuah peh vivo ding tiah an sim.
Ralkap council ih thuthan dan vek asile October 21 tiang ah PDF ih donak țum 986, bomb ih donak țum 2344, meisa ih siatsuahnak țum 312, a zaten tum 3642 a si tiah an sim.
Hi donak ruangah ralkap 75, palik 93, acozah hnațuan 14, a zaten mi 182 an thi ih mi 602 hriamhma an ngah tiah an tarlang. PDF ih thil tuahmi ruangah tualsung mipi 1155 an thi ih mi 765 hriamhma an ngah timi khal an tarlang cih.
